Әл-Фараби кітапханасында Әбу Насыр әл-Фарабидің туғанына 1155 жыл толуына орай ұйымдастырылған IV халықаралық Фараби форумы басталды.
Дәстүрлі форумның мақсаты – әл-Фарабидің бай мұрасы арқылы қазіргі қоғам дамуының рухани, тарихи және философиялық негіздерін түсіндіру, ойшыл мұрасын зерттеп жүрген отандық және шетелдік ғалымдарды біріктіру, әлемнің жетекші ғалымдары арасындағы диалог пен ынтымақтастықтың жаңа алаңын құру.
Форумға АҚШ, Ресей, Италия, Өзбекстан, Қырғызстан, Түркия, Әзірбайжан, Сирия, Египет және Иран сынды алыс-жақын шетелдерден 100-ден астам ЖОО ғалымдары қатысуда.
Форум аясында Түрік халықтары философия қоғамы Қазақ комитетінің II мәжілісі, «Фарабитану» жинағының 10 томдығының, Жақыпбек Алтаев пен Қанат Алтынбектің «Жиһангер ғұлама» кітабының тұсаукесері, «Аударма өркениетінің феномені: әл-Фараби мен түркі ғалымдарының мұрасы негізінде» атты халықаралық ғылыми конференция, «Әл-Фарабидің философиялық терминологияны қалыптастырудағы рөлі: философия тілі» атты пікірталас алаңы және басқа да іс-шаралар өтеді деп жоспарланған.
Сонымен қатар осы іс-шараға байланысты Әл-Фараби кітапханасы кітап көрмесін ұйымдастырды. Жалпы алғанда, көрмеге кітапхана қорынан 150-ден астам кітап пен мерзімді басылымдар қойылды.
Көрменің қорытындысы: іс-шараның мақсаты әл-Фарабидің ғылыми мұрасын тереңірек танып-білу, бүгінгі қоғамға, білім мен ғылымға қосқан үлесін талқылау, оның философиялық және әлеуметтік-қоғамдық ойларын кеңінен насихаттау.
Іс-шара барысында Әл-Фарабидің шығармашылығы мен ой-толғамдары, көптеген маңызды мәселелер қозғалды: ғылымның мәні, білімнің рөлі, қоғам дамуындағы философияның орны және оның адамзаттың дамуына ықпалы.
Сондай-ақ әл-Фарабидің 1155 жылдығына орай шыққан 10 томдық Фарабитану топтамасы мен Ж. Алтаев, Қ. Алтынбектің «Жиһангер ғұлама» кітабының тұсаукесері өтті. Бұл еңбектер кітапхана қорына сыйға тартылды, өз кезегінде кең аудиторияға ұлы ойшылдың құнды ғылыми мұрасымен тереңірек танысуға мүмкіндік береді.
