Әл-Фараби кітапханасында Ш.Уәлихановтың 190 жылдығына және Қазақстан халқы Ассамблеясының құрылғанына 30 жыл толуына арналған «Дәуір және тұлға: жыраулар мен қазақстандық зерттеушілердің шығармашылық түрлерін тілдік таныстыру» тақырыбында халықаралық дөңгелек үстел өтті.
Шараны Әл-Фараби атындағы ҚазҰУ-дың Түркітану және алтайтану ҒЗИ мен Әл-Фараби атындағы кітапхана бірлесіп ұйымдастырды.
Дөңгелек үстел білім беру сапасын арттыру, ғылыми лингвистикалық мектепті дамыту, білім беруді, ғылымды және практикалық қызметті интеграциялау факторы ретінде гуманитарлық білімнің даму үрдістері туралы тәжірибе және пікір алмасу мақсатында өтті.
Ғылыми жиында филология ғылымдарының докторы, профессор, түркітанушы, Әл-Фараби атындағы ҚазҰУ Басқарма төрағасы – ректоры Жансейіт Қансейітұлы Түймебаев, филология ғылымдарының докторы, Түмен индустриалды университетінің Мәдениетаралық коммуникация кафедрасының профессоры Салтанат Мақашева (Ресей), Қорқыт ата атындағы Қызылорда университетінің ғылыми жұмыс және халықаралық байланыстар жөніндегі проректоры, филология ғылымдарының кандидаты, доцент Майнұр Бөрібаева және Алматы, Астана, Шымкент қалалары университеттерінен тағы басқа да ғалымдар қатысып, қазіргі лингвистиканың өзекті тақырыптары бойынша баяндама жасап, пікір алмасты.
Кітапхана директоры Жадыра Арекенова «Әл-Фараби атындағы кітапхана қорындағы эпикалық тақырыптама» атты презентация жасады.
Сонымен қатар осы іс-шараға байланысты Әл-Фараби кітапханасы кітап көрмесін ұйымдастырды. Жалпы алғанда, көрмеге кітапхана қорынан 70-тен астам кітап пен мерзімді басылымдар қойылды.
