Әл-Фараби атындағы кітапханада «Жібек жолының кітап мәдениеті — өркениеттер диалогы» атты іс-шара аясында ҚазҰУ-да Қытай–Орталық Азия баспа орталығының салтанатты ашылу рәсімі өтті. Ауқымды шара Қазақстан мен Қытай арасындағы ғылыми, мәдени және білім беру салаларындағы ынтымақтастықты жаңа деңгейге көтеруге бағытталды.
Салтанатты жиынға университеттің Басқарма төрағасы – ректор Ж.Қ. Түймебаев, Қытай Халық Республикасының Алматы қаласындағы Бас консулы Су Фанцю, Сиань Цзяотун университетінің вице-президенті Цай Вэй, сондай-ақ екі елдің ғылыми-академиялық қауымдастығының өкілдері қатысты. Қонақтар өз сөздерінде халықаралық әріптестіктің маңыздылығын атап өтіп, жаңа орталықтың ғылым мен білім саласындағы ықпалдастықты дамытудағы рөліне ерекше тоқталды.
Іс-шара барысында Сиань Цзяотун университетінің өкілі Хань Юнцзюнь Әл-Фараби кітапханасының қорына 274 дана кітаптың табысталғаны туралы арнайы сертификатты табыс етті.
Аталған іс-шараға орай, Әл-Фараби кітапханасында тақырыптық кітап көрмесі ұйымдастырылды. Көрме бірнеше бөлімнен тұрды:
- «Қазақстан мен Қытай арасындағы ынтымақтастық»
- «Қазақстандағы қытайтану»
- «Аспанасты ел – Қытай»
- «Көршілес елдің әдебиеті»
- «Ғалымдарды біріктіру – табысқа апаратын жол»
Көрменің «Қазақстан мен Қытай арасындағы ынтымақтастық» бөлімінде екі ел арасындағы дипломатиялық қарым-қатынастардың тарихы мен даму кезеңдеріне арналған еңбектер ұсынылды.
«Қазақстандағы қытайтану» бөлімінде қытай тілі, жазуы және тіл біліміне қатысты ғылыми әдебиеттер қойылды.
«Аспанасты ел – Қытай» бөлімінде Қытайдың тарихы, мәдениеті, әдебиеті және қазіргі даму бағыты туралы кітаптар таныстырылды.
Ал «Көршілес елдің әдебиеті» бөлімінде қытай тілінде жарық көрген көркем әдебиеттер көпшілік назарына ұсынылды.
